Германия Экономика министрлігі: Германия Қытайға чиптерге арналған химиялық заттарды экспорттауға тыйым салуды жоспарлап отырған жоқ
Фото: China Daily / Reuters
Германия қытайлық жартылай өткізгіш өндірушілермен сауда соғысына қосылу туралы ақпаратты жоққа шығарды. Бұл туралы Германия экономика министрлігінің өкілі Биат Баронға сілтеме жасап, РИА Новости хабарлайды.
«Мен бұл хабарларды растай алмаймын. Экономика министрлігі чиптерге арналған химиялық заттарды Қытайға экспорттауға тыйым салуды жоспарлап отырған жоқ», — деді ол. Алайда Германияның жаңа шектеулер дайындамауы оның Қытайға экспортталатын қос мақсаттағы тауарларды бақылау ережелерін бұдан былай орындамайтынын білдірмейді, деп қосты Барон.
Бұған дейін Bloomberg агенттігі Германия канцлері Олаф Шольц үкіметі Қытайдың озық жартылай өткізгіштерді өндіруге қажетті тауарлар мен қызметтерге қол жеткізуін шектеу бойынша шаралар кешенін әзірлеп жатқанын хабарлады. Соның бірі чиптерді өндіруге арналған химиялық заттарды жеткізуді шектеу болды. Немістің Merck және BASF өнімдері болмаса, Бейжің өз саласын дамыта алмайды, деп жазады басылым.
Қытайға жеткізілімдерді шектейтін келесі ел Германия болуы мүмкін. 2022 жылдың қазан айында Америка Құрама Штаттары Қытайға американдық технологиямен жасалған чиптерді, сондай-ақ оларды өндіруге арналған жабдықты сатуға тыйым салды.
Кейін Америка билігі Жапония мен Нидерландыны Қытайдың жартылай өткізгіш өнеркәсібіне қарсы санкцияларға қосылуға көндірді. Бұған қоса, АҚШ билігі Оңтүстік Кореяны Бейжің жауап қайтарып, америкалық Micron компаниясының чиптерін елге жеткізуге тыйым салса, Қытайдың жартылай өткізгіштер нарығындағы тапшылықтың орнын толтырудан бас тартуға шақырды.