Иран полициясы хиджаб ережелерін сақтау үшін патрульдеу жұмыстарын жүргізеді
Фото: Мостафа Мераджи / Unsplash
Иран полициясы хиджаб кию нормаларының сақталуын қадағалайтын көлік пен жаяу патрульдерді ұйымдастыра бастады, деп жазады Tasnim.
Жергілікті құқық қорғау органдары өкілінің айтуынша, мұндай шаралар «қоғамдық бірлік пен қоғам қауіпсіздігіне» ықпал етуі тиіс. Полиция қызметкерлері енді орамал тағудан бас тартқан әйелдерге алдымен сөгіс беріп, хиджаб киюге кеңес беруі керек. Бағынбаған жағдайда полиция тәртіп бұзушыларға белгілі бір заңды шараларды қолданып, оларды жауапкершілікке тарта алады.
Иран Ислам Республикасының қылмыстық кодексіне сәйкес, хиджаб кию нормаларын сақтамаған әйелдер ақшалай айыппұлдан бөлек, 10 күннен екі айға дейінгі мерзімге бас бостандығынан айырылады. Оларға да қосымша әкімшілік шаралар, атап айтқанда, мемлекеттік қызметтен босату, жер аудару, елден шығуға және оппозициялық ұйымдармен байланысқа шығуға тыйым салу, мүлкін тәркілеу қолданылуы мүмкін. Басқаларды хиджаб киюден бас тартуға көндіретін және үгіттейтіндерге неғұрлым қатаң жаза қолданылады: олар бір жылдан 10 жылға дейін бас бостандығынан айырылуы мүмкін.
Бұған дейін ирандық студенттердің хиджаб киюден бас тартқаны үшін оқу орындарына кіруіне тыйым салынғаны хабарланған болатын. Кем дегенде 60 студент қыз сабақтан шеттетілгені атап өтілді.